КіруАТ СПОРТЫНА БАУЛИТЫН БӨЛІМ АШЫЛДЫ
Бүгін Орал қаласында қос бірдей спорт кешені ашылды. Оның бірі – «Қазақ күресі және жекпе-жек орталығы» болса, екіншісі – «Орал» спорт клубының ат спорты түрлері бойынша бөлімі. «Құс фабрикасы» ауданында орналасқан жасөспірімдерді ұлттық ат спортына баулу мақсатындағы аталмыш бөлімді қалалық әкімдік «Ишанов» жеке кәсіпкерлігімен бірлесіп ашқан болатын.
Ат спортына құштар өрендерді ұлттық спорттың төрт түрінен жаттықтыратын кешеннің ашылу салтанатында сөз алған БҚО әкімінің орынбасары Бақытжан Нарымбетов: – Елбасының «Ұлы даланың жеті қыры» атты бағдарламалық мақаласында ең алдымен атқа міну мәдениетіне басымдық береді. Қазақ халқы қашан да «Ат – ердің қанаты» деп, жылқы малын ерекше бағалаған. Көптен жоспарланып жүрген осындай ат спорты түрлері бөлімі бүгін жұмысына кіріскелі тұр. Жеке кәсіпкер Ақылбек Ишанов өз иелігіндегі бұл жерге бірнеше жыл бұрын жеке кәсібін бастаған болатын. Енді осы орталықты мемлекеттің қолдауымен осындай кешеннің базасы ретінде пайдаланғалы тұрмыз. 300 мыңдай тұрғыны бар облыс орталығында «Ат спорты түрлері бойынша бөлімнің» ашылуы – біз үшін үлкен мүмкіндік, – деді.
Қазақ күресі ассоциациясының басқарушы директоры Ербол Мырзабосынов атқа мінген қазақ балаларының рухы асқақ боларына сенім білдірді. «Спорт жұлдыздары» республикалық журналының бас редакторы Мұсағали Тасқалиев еліміздегі бірегей спорт кешенінен шыққан чемпиондарды аталмыш басылым арқылы насихаттауға уәде берді. Сондай-ақ игі бастаманы жүзеге асырған қала және облыс әкімдігі мен спорт мекемелеріне алғысын білдірді.
Ат спорты түрлері бойынша бөлімнің лентасын қию рәсімі жеке кәсіпкер Ақылбек Миразатұлы мен Бәйтерек ауданы қазақ күресі федерациясының президенті Нұрлыбек Хайруллинге берілді.
Салтанатты іс-шарадан соң қонақтар аударыспақ, жамбы ату, асық атудан спортшылардың көрсетілімін тамашалады. Сонымен бірге кешенді аралап көріп, жылқы шаруашылығымен айналысатын жеке кәсіпкерліктің және жаңадан ашылған бөлімнің жұмыс барысынан хабардар болды.
Орал қалалық дене шынықтыру және спорт бөлімінің басшысы Артур Шерғалиевтің айтуынша, қала әкімдігінің қолдауымен ашылған Ат спорты түрлері бойынша бөлімде жасөспірімдер спорттың көкпар, аударыспақ, теңге ілу, жамбы ату түрлерінен жаттығатын болады. – Біз «Ишанов» жеке кәсіпкерлігімен шарт жасасу арқылы бүгінгідей спорттық базаны жасақтадық. Алдағы уақытта 150 спортшыны дайындап, олардың арасынан Орал қаласының құрама командасын шығаруды жоспарлап отырмыз. Спорттың әр түрі бойынша жаттықтырушылар бекітілді, қажетті құрал-жабдықтар, киім-кешектер алынды. Ат спорты түрлері бөліміне балалар 7-9 жастап бастап қабылданады, – деді Артур Мұратұлы.
Бұл күні сондай-ақ Оралда «Қазақ күресі және жекпе-жек орталығы» ашылып, мұнда күніне 120 балаға жаттығуға мүмкіндік жасалды.
Кәусар БАЙҒАЛИЕВА
Версия для печатиСоңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу