КіруАҚ БАТА – АСЫЛ МҰРА
Жасы 45-тен асқан өлкедегі ер азаматтар бата айтудан сынға түсті. Елбасының «Болашаққа бағдар: Рухани жаңғыру» мақаласын жүзеге асыру аясында Орал қалалық мәдениет және тілдерді дамыту бөлімінің қолдауымен, қалалық орталықтандырылған кітапханалар жүйесінің ұйымдастыруымен өткен «Ақ бата – асыл мұра» атты байқауда жерлесіміз Т. Жұмағалиев жүлделі бірінші орынды иеленді.
Ақ батаның тәлім-тәрбиесін, берер өсиетін түсіндіруді мақсат тұтқан байқауға алғашында он жеті қария қатысса, осылардың арасынан жеті батагөй іріктеліп, соңғы финалда өз бақтарын сынады. Батагөйлер байқауы өзін-өзі таныстыру, би-шешендердің, ақын-жыраулардың тарихта қалған батасын жатқа айтып, жеребемен түскен дәстүрге байланысты бата беру кезеңдерінен тұрды. Ақ жүрекпен оқылған ақ бата байқауына Тихон Әліпқали, Үзілдік Елеубайқызы, Дариға Мұштанова, Нұржан Сертеков секілді зиялы қауым мен Ақжайық аудандық ардагерлер кеңесінің төрағасы Ә.Кереев қазылық етті.
Байқау нәтижесінде Т.Жұмағалиев І-орынды, Қ.Құсайынұлы ІІ-орынды, Р.Баймағамбетов ІІІ-орынды иеленді. Үміткерлер арасынан Н.Мәжитов, С.Қарабалин, Б.Құрмекешов, М.Тұрашевтарға алғыс хаттар мен сыйлықтар табысталды.
Нұрлан ЕДІГЕНОВ
Темірғали Жұмағалиев, байқау жеңімпазы:
– «Ақ бата – асыл мұра» батагөйлер байқауы барынша әділ болды деп ойлаймын. Ақ қағазға түскен ақ батаны ақжүрекпен орындап, ел игілігі үшін әмин деп бата бердім.
Білімді болсың жастарың,
Ашық болсың аспаның.
Татулықты ту еткен,
Орындалсың арманың.
Жастарға бата берейік,
Өссін, ұрпақ көбейіп.
Жылы сөздермен демейік!
Тихон Әліпқали, әділқазылар алқасының төрағасы:
– Бата деген сөзде қаншама мән мағына жатыр. Бірақ біздер соны білмейміз. Бата мен тілекті шатастыратын қаншама ел ағалары мен абыз қариялар бар. Рухани жаңғыру дейміз?! Ұлттық код дейміз?! Қане, біздің ұлттық кодымыз?! Не әннің сөзі дұрыс емес, әуені де тыңдауға келмейтін селтең-селтең еткен музыка. Жоқ, салауатты ұрпағым қателеспеңіздер! «Рухани жаңғыру» дегеніміз, бетін шаң басқан архивті қопарып қазақтың салт-дәстүрін қайтадан мықтап насихаттау. Батаның не екенің, оның қандай қасиеті бар екенін жастарға түсіндіруіміз керек. «Бата құдай сөзі» дегенді ұмытпауымыз керек. Бүгінгі байқау ойдағыдай болған жоқ. Бата үлгілерін ауыстырып алып, бір бет қағазға қарап оқып берді. Бұл ұят қой?! Сонда аталарымыз әлі күнге дейін ең құрғанда бір бата білмей ме? Келесі байқауларда осының барлығын қатаң ескеру керек. Батагөйлер сайысында эстрадалық музыкалардың не керегі бар. Қайда біздің термеміз?! Домбырамен ән айтылса бүгінгі байқаудың үйлесімі арта түсер еді.
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу