КіруЗАҢ ЖОБАСЫ ҚОҒАМНЫҢ ҚЫЗУ ТАЛҚЫСЫНДА
Қазіргі уақытта «Отбасылық-тұрмыстық зорлық-зомбылыққа қарсы іс-қимыл туралы» заң жобасы қызу талқылануда. Әлеуметтік желілер арқылы бұл заң жобасының қабылдануына қарсылық танытқандар өз пікірлерін білдіруде. Олардың қатарында оралдық ата-аналар да бар. Олар тәуелсіз заңгерлердің өздерімен жүздесіп, осы заңның әр бабы бойынша қарапайым сөздермен түсіндіріп берулерін сұрап отыр.
Бүгін, 22 қаңтар күні Оралдағы «Отбасы» орталығында көпбалалы аналардың ұсынысы негізінде басқосу ұйымдастырылды. Оған өңірдегі мәслихат депутаттары, әйелдер істері және отбасылық демографиялық саясат жөніндегі комиссия мүшелері қатысты.
Басқосуға келген аналардың сөзінше, «Отбасылық-тұрмыстық зорлық-зомбылыққа қарсы іс-қимыл туралы» заң жобасы қабылданар болса, ата-ана мен бала арасына іріткі салып, отбасының құтын қашыруға әкеледі. Дегенмен, сөз алғандар заң жобасымен өздері таныспаған. Айтуларынша, заң тілімен жазылған құжатты қарапайым түрде түсіну қиын. Сондықтан заңгер мамандар түсіндіріп берсе деген тілектері бар.
«Nur Otan» партиясының Батыс Қазақстан облыстық филиалы төрағасының орынбасары Гүлназ Құлжанова ата-аналар өз сөздерінде келтірген үйде әр балаға 15 шаршы метрден кеңістік болуы, «жыныстық еркіндік» туралы нормалар қазіргі жобада жоқ екенін атап өтті.
– Былтыр 23 қыркүйекте Мәжіліс депутаттары «Отбасылық-тұрмыстық зорлық-зомбылыққа қарсы іс-қимыл туралы» және оған ілеспе заң жобасын бірінші оқылымда мақұлдады. Алайда, сол кездегі жоба мен ҚР Парламенті сайтында қазіргі тұрған жобаның айырмашылығы көп. Арадағы үш ай ішінде қоғамдық ұйым өкілдерінің талқылауы, ұсынысы негізінде жобаға өзгерістер енгізілді. Белсенді ел ағалары заң жобасындағы кейбір баптардың біздің менталитетке келмейтінін, ұлттық дәстүрге кереғар болатынын айтып, қоғамдық пікірлерін білдірді. Шынын айтқанда бұл жоба әлі де толықтыруды қажет етеді. Осы ретте ұсыныстарымызды жазбаша түрде тізіп жолдауымыз қажет, – деді Гүлназ Мағжанқызы.
ҚР ІІМ-нің мәліметінше, өткен жылдың басынан қыркүйекке дейін зорлық-зомбылық фактілері бойынша 130 мыңдай арыз түскен. Әсересе, пандемия басталғаннан отбасылық зорлық-зомбылық оқиғалары күрт көбейген. Сала мамандары осы орайда заңның қабылдануы қажеттігін алға тартып отыр.
Заң жобасын түсіндіру мақсатында алдағы уақытта заңгерлердің қатысуымен басқосу және құзырлы мекемелердің өкілдерімен тікелей эфирдегі жүздесу ұйымдастырылатын болады.
Эльмира НҰҒМАНОВА,
zhaikuni.kz
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу