КіруОРАЛДА 200-ДЕН АСА САУДА ЖӘНЕ ҚЫЗМЕТ НЫСАНДАРЫ ЖҰМЫСЫН ТОҚТАТТЫ
Коронавирус пандемиясына байланыста Қазақстан Республикасы аумағында төтенше жағдай енгізілуіне орай бүгін БҚО өңірлік коммуникациялар қызметі алаңындағы брифингте жергілікті атқарушы органдар тарапынан қабылданған іс-шаралар мәлімделді.
Қазіргі уақытта өңірдегі эпидемиологиялық ахуал тұрақты.Қала және облыс аумағында коронавирус инфекциясы тіркелген жоқ. Бүгінгі күні 26 адам провизорлық стационарда, 53 адам үй карантинінде, 133 адам жалпы бақылауда. Қаланың санитар-эпидемиологтары әуежай, темір жол вокзалында келушілерді тепловизор құралымен тексеріп, анкета толтыртуда. 20 наурыздан бері Орал қаласына 3000-нан аса адам келген.
Қала әкімі Абат Шыныбеков атап өткендей, мемлекет басшысы және облыс әкімінің тапсырмасына сәйкес Орал қаласында төтенше жағдай кезінде шұғыл әрекет ететін штаб құрылып, бес бағытта жұмыс жүргізуде. Бірінші – мониторинг тобының ақпараттық түсіндіру жұмысы, екінші – коронавирус инфекциясын алдын алу шаралары, соның ішінде дезинфекция жұмыстарын жүргізу, үшінші – әлеуметтік маңызды азық-түлік бағасын оңтайландыру, бақылау, төртінші – қаладағы мемлекеттік мекеме қызметкерлерін қашықтықтан жұмыс жасау режиміне көшіру, бесінші – әлеуметтік жағдайы төмен азаматтарды қолдау.
– Қазіргі таңда мәдени нысандардың қызметі, спорттық және басқа да бұқаралық іс-шаралар уақытша тоқтатылды. Ірі сауда орындарының жұмыс кестесі шектелді. Мектеп оқушылары демалыста, жоғары және арнаулы оқу орындарының студенттері қашықтықтан оқуға көшірілді. Кинотеатр, театр, концерт залдарының, көрмелердің, мектептен тыс қосымша білім беру орындарының, түнгі клуб, фитнес залдарының, сауда орындарындағы балалар ойын алаңдарының, компьютер, спорт клбутары және аумағы 2000 шаршы метрден асатын азық-түлік емес базарлар мен сауда үйлерінің жұмысы тоқтатылды. Жалпы 221 сауда және қызмет нысанының жұмысы тоқтатылды. Қала аумағындағы 54 ауладағы алаңдар жабылды және бүгіннен бастап қалалық мәдениет және демалыс саябағы жабылды, – деді қала басшысы Абат Абайұлы.
Облыстың бас санитарлық дәрігерінің нұсқамасымен аумағы 2000 шаршы метрден төмен сауда орындарының жұмыс уақыты шектелген еді. Бұл 1200 дүкен мен қоғамдық тамақтану орындары, супермаркеттер мен азық-түлік дүкендері. Яғни, олар 9.00-ден бастап кешкі сағат 21.00-ге дейін жұмыстарын жалғастыра алады. Дегенмен, талапқа бағынбай отырғандары да бар. Бұл туралы қалалық Полиция басқармасы бастығының бірінші орынбасары, полиция майоры Жантемір Иманалиев баяндады. Бүгінгі күні Орал қаласы жерілікті полиция қызметкерлері рейд жүргізу кезінде төтенше жағдай талабын бұзғандарға қатысты 22 әкімшілік хаттама толтырған. Олардың 19-ы мамандандырылған әкімшілік сотында қаралып, тоғыз меншік иесіне 10 АЕК көлемінде (26 510) айыппұл салынған. 10 меншік иесі 2 күннен 10 күнге дейінгі мерзімде қамауға алынып отыр.
Жастар саясаты мәселелері басқармасы басшысының міндетін атқарушы Нұрхат Ораштың айтуынша, батысқазақстандық волонтерлер қазіргі уақытта өтініш берген мұқтаж жандарға азық-түлік, жеке қорғану құралдарын жеткізуде белсенді жұмыс атқаруда. Бүгінге дейін 437 отбасыға көмек берілген. Сондай-ақ волонтерлер бетперделер тігуді бастады. Осы уақытқа дейін еріктілер 15 мыңдай бетперде дайындап, таратқан.
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу