МЕРЕКЕНІ ҚАУІПСІЗ ӨТКІЗЕЙІК

Мерекелі күндері өрттің туындау қаупі жоғары. Сол себепті БҚО ТЖД күшейтілген жұмыс режиміне көшеді. Бүгін өңірлік коммуникациялар қызметінің ақпарат алаңында БҚО Төтенше жағдайлар департаменті өрт қауіпсіздігі саласындағы профилактика және бақылау қызметі басқармасының бастығы, азаматтық қорғау подполковнигі Ерлан Төрегелдиев мерекелік шаралар алдындағы төтеншеліктердің дайындық жұмыстарын мәлім етті.

Қауіпсіздік шараларын күшейту мақсатында БҚО ІІД мен БҚО ТЖД-ның мерекелерді өткізу кезіндегі қауіпсіздікті қамтамасыз етуге бағытталған алдын алу шараларының жоспары жасалған. Таяу күндері БҚО ІІД Орал қалалық жергілікті полиция қызметі учаскелік инспекторларымен бірге рұқсат етілмеген орындарда пиротехникалық өнімдерді сататындарға рейд жүргізіледі. Балаларға өрт туындаған жағдайда әрекет етуді үйрету мақсатында облыстық білім беруді ақпараттандыру орталығында «Өрт қауіпсіздігінің негізгі ережелері» тақырыбында интерактивті сабақ өткізіледі.

Білім беру, денсаулық сақтау, әлеуметтік нысандарда және сауда үйлері мен ойын-сауық кешендері, халық көп жиналатын ғимараттарда қауіпсіздік шаралары қамтамысыз етілуі керек. Бүгінде облыстық ТЖД тарапынан мекеме-ұйым басшылары мен жетекшілеріне мерекелерді өткізу кезіндегі өрт қауіпсіздігін сақтау ережелеріне байланысты түсіндіру хаттары жіберілген.

Департамент қызметкерлері еріктілермен бірге халық көп жиналатын орындарда жаңа жыл мерекесін қауіпсіз ұйымдастыру және пиротехникалық өнімдерді қолдану ержелері туралы ақпараттық жадынамалар таратуда.

Салтанатты шараларды өткізу алдында Өрт қауіпсіздігін қадағалау инспекторлары ғимарат басшысымен бірге мерекені өтетін орынға комиссиялық бақылау жүргізеді.

Елмұра АСХАТҚЫЗЫ

Версия для печати