«ҚАЗИИТУДАҒЫ» ӘЗ НАУРЫЗ!

Ұлыстың ұлы мейрамы әз Наурызды іргелі оқу орындарының бірі «ҚазИИТУ» ғылыми-білім кешені биыл ғимараттың оныншы қабатында қарсы алды. «Достық шаңырағы астында» атты театрландырылған қойылымды қонақтар назарына ұсынған аталмыш кешеннің студент-жастары Ұлық мейрамға ерекше дайындықпен келгендерін өнерлерімен қоса, ұлттық тағамға толы мол дастархандары арқылы да көрсетті.

Наурыз тойында «ҚазИИТУ» ғылыми-білім кешенінің Құқықтану факультеті армян ұлтының, «Республикалық жоғары техникалық колледжі» украин халқының, Техникалық факультеті шешен халқының, Қоғамдық-гуманитарлық пәндер кафедрасы қазақ халқының, Жалпы техникалық пәндер кафедрасы корей халқының, Экология және тіршілік қауіпсіздігі негіздері кафедрасы татар халқының, Экономика және менеджмент кафедрасы орыс халқының ұлттық киімдерін киіп, ас мәзірлерін дайындады. Сондай-ақ олар БҚО Қазақстан халқы Ассамблеясының өңірдегі көпұлтты этно-өкілдерінің татулығы мен бірлігін, ынтымағын өнерлері арқылы да дәріптеді. Кең залға жиналған қонақтарға әр факультеттің студент-жастары көрісіп, ұлттық дәмдерінен ауыз тигізді. Ән әуелеп, би қалқыған мерекеде «ҚазИИТУ» ғылыми-білім кешенінің құрылтайшысы, техника ғылымдарының кандидаты, профессор, «Қазақстандағы 100 Жаңа есім» жобасының жеңімпазы Ақсерік Әйтімов қонақтар мен студенттерді, ұжымды Ай мен Күн теңелген, Жер-Ана жібіген, арман мен адалдық, құштарлық пен сұлулық, тазалық пен татулық сыйлаған Ұлыстың ұлы күнімен құттықтады. Мерекелік шараға зиялы қауым өкілдері мен Ассамблея мүшелері, «Нұр Отан» партиясы өкілдері, ардагерлер қатысты. Осы меймандардың атынан танымал аға-апалар Хамит Тастамбеков пен Рауза Әбілаева сөз алып, бірлігі мен тірлігі жарасқан «Андас» және «ҚазИИТУ» оқу орнының ұжымына шынайы лебіздерін айтып, студент-жастарға ашық аспан, терең білім мен еңбек, қанағат тіледі.

Шарада көпшілік этно ауылдарға саяхат жасалып, театрландырылған көріністерге кезек берілді. Әр ұлт өкілдерінің ұлттық болмысын дәріптеген кафедралардың профессорлық-оқытушылық құрамы мен студенттері бірлесіп өнер көрсетіп, «Наурыз» мерекесінің ажарын аша түсті. Айталық, Самарқанның көк тасы жібіп, Сарыарқаның сеңі бұзылған күнді «Қазақ ауылы» керемет қарсы алып, қазақ халқының жаңа жылын Алаш жұрты қалай қарсы алуы керектігін паш етті. «ҚазИИТУ-дың» Техникалық пәндер кафедрасының І-курс студенті Әзілхан Сисенов «Еңбек термесі», «Он алты қызды» әуелетті. «Масис» армян этномәдени қоғамдық бірлестігінің төрағасы Аветик Амирханян, «Вайнах» шешен-ингуш қоғамдық бірлестігінің төрағасы Данильбек Саратов және өзге де этно мәдени бірлестік өкілдері қазақ халқының қонақжай, бауырмал қасиетіне ризашылықтарын білдіріп, тойға шашу ретінде ұл-қыздарын билетіп, белсенділік танытты. «Тонг-иль» Корей этномәдени бірлестігінің төрағасы Ан Виталий Константинұлы ортаға шығып, кәріс халқының ұлттық қолөнер бұйымдарын таныстырды. Кеш соңында барша қауым «Қара жорға» биін ортаға шығып билеп, мерекенің көрігін қыздырды.

Наурыз тойына арнайы шақырылған барша қонақтар мен студенттер қолдарын жайып, осы оқу орнының ақсақалы Асқар Әшуұлының ақ батасын алды. Залдың төрінен орын алған «Қазақ ауылының» киіз үйіне бас сұғып, мол дастарханнан дәм ауыз тиген меймандар «Ұлыс оң болсын, ақ мол болсын, ҚазИИТУ-да күнде той болсын!» деп тілектерін білдірді.