5 мың білім грантына кімдер үміткер бола алады?

Министрдің сөзінше, білім гранттары биыл 1 қыркүйектен бастап бөлінеді.

 – Негізгі талаптар: талапкер ҰБТ тапсыруы,  шекті баллдан өтуі, көп балалы және атаулы әлеуметтік көмек алатын отбасыдан шыққан балалар болуы тиіс. Осындай балалар 5 мың грантқа үміткер бола алады,- деді А.Аймағамбетов.

Министр биыл бөлінген 53 700 білім гранты талапкерлерге берілгеннен кейін ғана  5 мың грант үлестірілетінін айтты.

– Алдымен осы гранттарды бөлу жүргізіледі. 1 тамыздан кейін грант тізімі белгілі болады. Грантқа ілікпеген осы санаттағы талапкерлер 5 мың грантқа өтініш жаза алады. Тест тапсырып, шекті балл жинап, өтініш жазып, содан кейін жинаған балына сәйкес грант бөлінеді,- деді білім және ғылым министрі Үкімет үйінде өткен баспасөз мәслихатында.

Әрі гранттарды бөлуде ешқандай сыбайлас жемқорлық қаупі болмайтынына сендірді.

Айта кетейәк, 26 маусым күні мемлекет басшысы Қасым-Жомарт Тоқаев көп балалы және аз қамтылған отбасылардың балаларына 5 мың білім гранты бөлуді тапсырған болатын.