КіруМЕРЕКЕ ҚАРСАҢЫНДА ҚОНЫС ТОЙ КӨБЕЙДІ
Бүгін, Конституция күні мерекесі қарсаңында Зашаған кентіндегі Саратов тас жолы бойынан 117 пәтерлі, көпқабатты тұрғын үй пайдаланылуға берілді. Облыс әкімі Ғали Есқалиев баспаналы болған жандардың қуанышын бірге бөлісіп, пәтер кілттерін табыс етті.
– Баршаңызды ел Конституциясының 25 жылдық мерейтойымен шын жүректен құттықтаймын! Ата Заңымызда еліміздің ең қымбат қазынасы – адам және адамның өмірі, құқықтары мен бостандықтары деп айқын көрсетілген. Ел халқының күнделікті өмір сүру жағдайын жақсарту үшін бірнеше мемлекеттік бағдарламалар жүзеге асуда. Солардың бірі – Елбасымыздың бастамасымен жүзеге асырылып жатқан «Нұрлы жер» бағдарламасы. Аталған бағдарлама аясында бой көтерген тұрғын үйлердегі әр пәтердің бір шаршы метрі 140 мың теңгеден сатылуда. Ал мелекет тарапынан тұрғын үй салушы компанияға әр шаршы метрі үшін қосымша 50 мың теңге қаржы аударылады. Бұл да болса баспана алуды мақсат еткен жерлестеріміз үшін үлкен қолдау. Дәл осындай жеңілдіктер басқа мемлекеттерде қарастырылмаған. Сонымен қатар бірқатар жерлестеріміз «Тұрғын үй құрылыс жинақ банкі» АҚ арқылы жеңілдетілген несиеге қол жеткізіп, баспаналы болуда. Аталған несие 25 жыл мерзімге, бес пайыз үстемақымен беріледі. Қорыта айтқанда, өңір тұрғындарын баспанамен қамту мақсатында мемлекет тарапынан барлық жағдай жасалуда. Бүгінгі пәтер иелерін қоныс тойларымен құттықтаймын. Әр шаңыраққа бақ пен береке тілеймін. Жаңа пәтерлердің терезесінен әр күннің нұр шуағы шашылып, бақытты бүлдіршіндердің күлкісі естілсін, – деген облыс әкімі Ғали Нәжімеденұлы бірқатар тұрғындарға пәтер кілтін табыстады.
Бүгін баспаналы болғандардың қатарында Альберт Төлешқалиев те бар. Жас жанұяның отағасы полиция басқармасында, жары білім білім беру саласында қызмет атқарады екен. Бақытты отбасы бұл күнді ұзақ күткендерін айтты. – Шаңырақ көтергенімізге сегіз жыл болды. Осы кезге дейін пәтерден-пәтерге көшіп жүрдік. Осыдан төрт жыл бұрын «Тұрғын үй құрылыс жинақ банкі» АҚ- тан есепшот ашып, қаражат жинай бастадық. Енді бүгін екі бөлмелі су жаңа пәтерге қол жеткіздік, – дейді ол.
Соңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу