«ҒАЖАЙЫПТАН ҮМІТ ҮЗБЕЙІК…» – ХАДИША ТЕАТРЫНЫҢ ДИРЕКТОРЫ ТЕАТРДЫҢ ЖҰМЫС ЖОСПАРЫМЕН БӨЛІСТІ

Х.Бөкеева атындағы БҚО қазақ драма театрының шығармашылық құрамы кезекті еңбек демалысынан оралып, көрермендері үшін жаңа бейнетуындыны ұсынды. Жұбан ақынның «Мен қазақпын» өлеңіне түсірілген рухты туынды театрдың instagram әлеуметтік желісіндегі парақшасында жарияланды және театр басшысы Салтанат Абулғазиева өз парақшасында туындының түсірілімі туралы жазба қалдырып, алдағы жоспарларымен бөлісті.

«Үнемі ізденіс үстінде, сан түрлі идеямен жүретін жандар үшін карантин де, кезекті еңбек демалысы да кедергі болмады. Алғашқы нәтижесі – назарларыңызға ұсынып отырған бейнетуындымыз. Биыл 100 жылдық мерейтойы атап өтіліп жатқан Жұбан ақынның «Мен қазақпын!» атты рухты туындысына түсірілген бейнеролик өткеніміз бен бүгіннің байланысы, тарихтың терең сырлары жайлы сыр шертіп, қиын-қыстау сәтте еңсесі түскен ел-жұрттың жігерін жанып, жүректерге жалын береді деп сенемін. Аталған жұмысты әзірлеу барысында облыстық мәдениет басқармасының қолдауымен Бөкей ордасының Хан ордасы және Қазталов ауданына қарасты Бостандық ауылдарында, Орал шаһарының аумағында қызу түсірілім жұмыстары жүргізілді. Жай ғана бейнеролик емес, қысқа метражды фильмге татырлық туынды болуы тиіс деген ұстаныммен еңбектенген жоба авторы – театрымыздың бас режиссері Гаухар Адайдың, түсірілім және монтаждау жұмыстарын өте сәтті алып шыққан бейнеоператорымыз Наурыз Халиттің, шығармашылық жұмыстарды ұйымдастыруда тер төккен театр қызметкерлерінің еңбектері ерекше» деп жазды Салтанат Мақсотқызы.

Театр басшысының жазбасында көрсетілгендей, қандай жағдай болмасын театр көрермендері үшін ізденісті тоқтатпайды және бұл ретте жерлес ұлы тұлғалардың мерейтойлары да елеусіз қалмайды. Сондай-ақ жаңа премьера да дайындалуда.

«Қандай тоқырау сәттер орын алмасын, театр жұмысы тоқтап қалмайтыны анық. Көрерменмен көзбе-көз жүздесуге рұқсат етілгенге дейін арадағы алтын көпірді жалғап тұрар жұмыстардың алуан түрін байқап көреміз. Тамыз айы бойына шығармашылық ұжым Қадыр ақынның өлеңдерін, қыркүйек айы бойына Жұбан ақынның жырларын тарту етпек. Ұлы мәртебелі Тәуелсіздік мерекесіне орай Махамбет Өтемісұлының отты өлеңінен әдемі туынды дайындамақ ниеттеміз. Оған қоса «Жұбан» спектаклі премьерасының да ауылы алыс емес» деп алдағы жоспарларға тоқталды.

Театр ғимаратына күрделі жөндеу жүргізу де жоспарда. Бүгінде қажетті жобалық-сметалық құжаттар жасақталуда. Бұл жөнінде рухани шаңырақтың директоры Салтанат Мақсотқызы өңір басшысы Ғали Есқалиевтің жанашырлықпен қолдау білдіріп отырғанын атап өтті және ғажайыптан үміт үзбей, ақкөңіл көрерменмен арқа-жарқа кездесер күн туғанын күтетінін жеткізді.

zhaikuni.kz

Версия для печати