«АҚЖАЙЫҚ – МЕЙІРІМ МЕКЕНІ». КӨПБАЛАЛЫ ОТБАСЫЛАРҒА КӨМЕК КӨРСЕТІЛДІ

Батыс Қазақстан облысы білім басқармасының ұйымдастыруымен 18-20 ақпан күндері Орал қаласындағы А.Байтұрсынов атындағы №10 жалпы орта білім беретін мектебінде мектепке дейінгі, жалпы білім беру ұйымдары мен қосымша білім беру ұйымдарының басшыларына, аудандық, қалалық әдістемелік кабинет меңгерушілеріне арналған «Білім беру мазмұнын жүйелі жаңарту тұрғысындағы мектепті басқару» тақырыбында облыстық оқыту семинары өтуде.

Семинар жұмысына мектепке дейінгі, жалпы білім беру ұйымдары мен қосымша білім беру ұйымдарының басшылары, аудандық, қалалық әдістемелік кабинет меңгерушілерінен 500-ге жуық білім саласының қызметкерлері қатысуда. Семинар жұмысы еңбек тәртібін сақтау, ішкі саясат, діни сауаттылық, қоғамдық денсаулықты сақтау, құқық бұзушылықтың алдын алу, білім беру ұйымы басшыларының кәсіби шеберлігін арттыру, менеджменттегі жаңа технологиялармен таныстыру, білім саласындағы өзгерістерді енгізудің тиімді жолдарын табу және нәтижеге бағытталған жұмыстарды жүргізу, озық педагогикалық идеялар мен «Назарбаев зияткерлік мектебі» тәжірибелерін жалпы білім беретін мектептерге енгізу мақсатында ұйымдастырылды. Семинар барысында Батыс Қазақстан облысы тілдерді дамыту, жастар саясаты, еңбек инспекциясы, ішкі саясат, дін істері басқармасы, қоғамдық денсаулық сақтау, полиция департаменті, «Назарбаев зияткерлік мектептері» ДББҰ филиалы Орал қаласындағы ФМБ Назарбаев зияткерлік мектебі, Қазақстан Республикасының мемлекеттік қызмет істері және сыбайлас жемқорлыққа қарсы іс-қимыл агенттігінің БҚО бойынша департаменті өкілімен, «Өрлеу» БАҰО АҚ БҚО ПКБАИ мамандары және Ы.Алтынсарин атындағы Ұлттық білім Академиясының ғылыми қызметкерімен кездесіп, ой бөлісіп, практикалық тұрғыда жұмыстанады.

Үш күнді қамтитын семинар аясында білім басқармасының ұйытқы болуымен «Ақжайық мейірім – мекені» қайырымдылық жәрмеңке-концерті ұйымдастырылды.

Аталмыш қайырымдылық шарасы облыс әкімі Алтай Көлгіновтің бастамасымен мүмкіндігі шектеулі, көп балалы және аз қамтылған отбасыларды қолдау мақсатындағы «Мейірімді көктем» жобасы аясында ұйымдастырылды. Қайырымдылық концертіне Ғ.Құрманғалиев атындағы облыстық филармония ұжымы, Орал қаласы физика-математикалық бағыттағы Назарбаев зияткерлік мектебі «Назарбаев зияткерлік мектебі» ДББҰ филиалының, облыстық, қалалық білім беру ұйымдарының оқушылары, колледж студенттері қатысты. Қайырымдылық шарасынан түскен қаржыны БҚО білім басқармасының басшысы Шолпан Қадырова жылы жүректі, жомарт қолды ұстаздар мен филармония ұжымына алғысын білдіре отырып, 6 бала тәрбиелеп отырған Владимир Еремин мен Бахытгүл Шакировалардың отбасына және 7 бала тәрбиелеп отырған жанұя Бисембай Қаржауов пен Ләззат Өтепқалиеваларға 280 000 теңгеден табыстады.

Өз кезегінде кеш иелері білім басқармасына, білім саласының қызметкерлеріне және жас өнерпаздарға шексіз ризашылықтарын білдірді.