«Сағаттың өлең сағаты әлі соғып тұр…»

Бүгін, қарашаның 9-ы күні Қадыр Мырза Әлі атындағы облыстық мәдениет және өнер орталығында облыстық мәдениет, тілдерді дамыту және архив істері басқармасы мен Қадыр Мырза Әлі атындағы облыстық мәдениет және өнер орталығының ұйымдастыруымен қазақ әдебиетінің көрнекті өкілі, ақын Сағат Әбдуғалиевтың 75 жылдығына орай « Жүрегіме жүгі түсті жаһанның» атты облыстық жыр мүшәйрасы болды.

Шараға келгендер аталмыш сарайдың алдындағы ескерткішке жиналып, Сағат Әбдуғалиевты еске алды. Ескерткіштің алдына облыстық мәдениет басқармасының басшысы Сайран Дүйсенов пен ақынның ұлы Айқын Әбдуғалиев гүл шоғын қойды.

Бұдан кейін мүшәйраның ашылу салтанатында сөз сөйлеген облыс әкімінің орынбасары Бақытжан Нарымбетов: – Құрметті өнер сүйер қауым! Ақжайық өңірінен шыққан тума талант Сағат Әбдуғалиевтың жырлары ешқашан өшпейді. Қағаз ұстап, қалам ұштаған буын өкілдері ақынның жырларын жата – жастана оқып, жатқа айтып жүреді. Себебі, оның өмір сағаты тоқтағанмен, өлең сағаты әлі соғып тұр. Небәрі 36 жас ғұмыр кешкен ақын қазақтың жүрегінде қалды. Қысқа ғұмырында тағдырдың ащы – тұщысын татып үлгерген ол поэзия аспанында жарқ етіп көрінгенақын,-деді. Бұдан кейін ақынның ұлы Айқын Әбдуғалиевтың иығына шапан жауып, құрмет көрсетті.

Содан кейін сахна төрінде сегіз ақын Сағат Әбдуғалиевтың жауһар жырларын төгілте оқып, көрермендердің ықыласына бөленді. Мүшәйра нәтижесінде бас жүлде Абылайхан Мақсұтовқа бұйырды. Бірінші орынға Мәрлен Ғилымхан, екінші орынға Ақтілек Әлібекұлы лайықты деп танылды. Үшінші орынды Алтынбек Ермекқалиев иеленді. Барлық жеңімпаздар мен қатысушылар Алғыс хатпен марапатталып, ақшалай сый-сияпат көрсетілді.