Облыс әкімі орталық даңғылдағы абаттандыру жұмыстарын тексерді

Батыс Қазақстан облысының әкімі Нариман Төреғалиев Орал қаласындағы Назарбаев даңғылында жүргізіліп жатқан абаттандыру және жаңғырту жұмыстарының барысымен танысты. Қаланың орталық көшелерінің бірі саналатын бұл аумақта жаяу жүргіншілерге қолайлы жағдай жасау, қоғамдық кеңістіктің сапасын арттыру және шаһардың сәулеттік келбетін жаңарту көзделіп отыр.

Жобаның жалпы құны 600 млн теңгені құрайды. Қазіргі таңда мердігер мекеме анықталып, құрылыс-монтаж жұмыстарына кіріскен. Негізгі жұмыстар аясында ұзындығы 1 шақырымнан асатын жаяу жүргіншілер жолының ескі асфальт қабаты алынып, оның орнына заманауи төсемтастар төселуде. Бұл тұрғындардың қауіпсіз әрі жайлы қозғалысына мүмкіндік береді.

Сонымен қатар жоба шеңберінде көше бойындағы арық жүйесін жаңарту қарастырылған. Бұл жауын-шашын кезінде судың жиналып қалмауына және аумақтың санитарлық жағдайын жақсартуға ықпал етпек. Бұдан бөлек, даңғыл бойына көгал егіліп, сәндік ағаш көшеттерін отырғызу жоспарланған.

Қазіргі уақытта нысанда жұмыс қарқынды жүргізілуде. Мердігер мекеме қажетті құрылыс материалдары мен жұмыс күшінің жеткілікті екенін мәлімдеді. Жоспарға сәйкес, абаттандыру жұмыстары мамыр айының соңына дейін толық аяқталуы тиіс.

Нысанды аралау барысында аймақ басшысы жауапты сала өкілдеріне бірқатар тапсырма берді. Атап айтқанда, қала көшелеріндегі тазалық жұмыстарын күшейту, ескірген жарық бағаналарын жаңарту және абаттандыру сапасын тұрақты бақылауда ұстау қажеттігін атап өтті. Облыс әкімі қала басшылығына жұмыстарды белгіленген мерзімде әрі сапалы аяқтауды тапсырды.

Әдемі Бақытжанқызы