МҮГЕДЕК ЖАНДАР МҮДДЕСІ ҮШІН

Жоба координаторы Рауза Луқпанқызы шараны ашып, «Жеңістің» негізін қалаушы Азон Шаймарданов жаңа жобаға сәттілік тіледі.

– «Қазақстандағы мүмкіндігі шектеулі адамдарға арналған ақпараттық-кеңес беру қызметі» жобасы арқылы мүмкіндігі шектеулі жандардың өмірге бейімделуі мен қоғамға сіңісуіне мүмкіндік жасалып, «бір терезе» қағидаты арқылы заң, әлеуметтік және құқықтық мәселелер бойынша кеңес алу, тренинг пен онлайн іс-шаралар нәтижесінде психологиялық көмек көрсетілмек. Сондай-ақ жоба аясында түрлі салада жетістікке, табысқа қол жеткізген мүмкіндігі шектеулі азаматтар туралы бейнежазба түсіріп, арнайы ашылған YouTube арнасы арқылы оларды ел көлеміне таныту көзделген. СММ, таргетинг, графикалық дизайн, есепші мамандықтарына онлайн оқыту курстарын, ал тігінші, аспазшы, шаштаразшы, дәнекерлеуші, арамен кесуші, жиһаз жинаушы ісіне қызығушылық танытқандарға оффлайн оқыту курстары ашылады. 100 кембағал жанның білімін арттырып, кем дегенде 10 адамның жұмысқа орналасуына жәрдемдеспекпіз, – деді «Жеңіс» мүгедектер қоғамдық бірлестігінің төрайымы Айгүл Кенжеғалиқызы.

Қоғамдық бірлестіктің психолог маманы Роза Бакесова өткізген «Менің өмірлікбасымдықтарым» атты коучинг-тренинг бейімділік, табандылық қарым-қатынас орнатуды қалыптастыру, өмірдің құндылығын сезіндіріп, құрметтеуге, бағалауға үйрету және өз ойын ашық айтуға дағдыландыру мақсатына бағытталды. Бес топқа бөлініп қатысқан мүмкіндігі шектеулі жандар өз ойларын еркін жеткізіп, тренингке белсене қатысты.

– Бұл – мүмкіндігі шектеулі адамдар үшін республикалық бағыттағы үлкен қолдау. Яғни, мүмкіндігі шектеулі жандар үнемі мемлекет назарында деген сөз. Қоғамнан тыс қалмай, білімін шыңдап, кәсібін бастасын деген бағыттағы жұмыстарыңызға сәттілік тілеймін. Мамандармен бірлесе отырып жасалған жұмысты көріп отырмыз. Батыс Қазақстан өңірінде бастау алған бұл бастама басқа облыстарда да сәтті жалғасын тапсын, – деді Жұмыспен қамту және әлеуметтік бағдарламалар бөлімінің зейнеткерлер мен мүгедектерге әлеуметтік қызмет көрсету аумақтық орталығының басшысы Абзал Молдағалиев.

Бірлестік төрайымы өз сөзінде жоба таныстырылымының «Тең қоғамда» өтуіне қолдау білдіргені үшін орталық басшысына алғыс айтты.