КіруРИНАТТАЙ ҚАЙСАР ҰЛДАР КӨБЕЙСЕ ЕКЕН?!.
Ашық аспан астында қаңтардың алғашқы күндерінде ешкім ойламаған тұстан елімізге төнген қауіп пен қатер қаншама отбасын қайғыға батырып кетті десеңізші?! Солардың арасында біздің жерлесіміз Ринат Қамбетов те бар. Отыз үш жасында аққан жұлдыздай ағып түскен қайран ер Алматы полиция департаменті Алмалы аудандық полиция басқармасының старшинасы қызметін адал атқарып жүр екен. Ол сол күні содырлардың қолынан қаза табамын, бұл жарық дүниемен мәңгілік қоштасамын деп ойлап па?!
Еліміздің тыныштығын аяқ астынан бұзған жаппай тәртіпсіздіктің кеселі мен кесапатын ел-жұртым біліп, жағасын ұстап отыр ғой. Ел экономикасына келген шығынды, қираған үйлер мен ғимараттарды, бүлінген дүниелерді сіз бен біз болып еңсерерміз-ау. Бәрінен бұрын қан төгіліп, адам өмірінің қапияда үзілуін айтсаңызшы?! Ринаттай қаншама ұландардың, сарбаздардың орнын енді кім толтырады?! Олардың ата-аналары мен бауырларының, жастай жесір қалған жан-жары мен балапандарының көз жасы, обалы кімге және кімдерге?! Айтарға сөз жоқ!
Сай-сүйегіңді сырқыратар оқиға кезінде Ақ Жайықтың тумасы, титтейінен Қаратөбенің Қалдығайты топырағында құлыншақтай еркін өскен Ринаттың қаза табуы жерлестерін бей-жай қалдырмады. Өте тәрбиелі, білімді, ұлтжанды, өнерлі, елге белгілі Қамбетовтер әулетінен шыққан тұңғыш немеренің қазасы онсызда күңерген оралдықтардың көңілін жабырқатты, жылатты. Бірақ, амал не. Қолдан келер қайран бар ма?!
Иә, «Ажал айтып келмейді». Десек те, Ринат Талғатұлының ерлікпен көз жұмған, өмірінің соңғы минөттерінде Алты Алашын жаудан қорғаған сәттері ел есінен, қаңтардағы тарихи оқиғадан ойып тұрып өз орнын алмақ. Ол өзі қызмет атқарып жүрген, еңбек етіп нәпақасын тауып, отбасын асырап жүрген қызметтік ғимаратына тұтқиылдан жауыздар шабуыл жасаған тұста кешегі Нүркен мен Төлегендей жауға қарсы атылған екен. Арпалысқан тұста кеудесін оққа тосқан екен. Елім деп еңіреген азаматымыз Отан-Анасын, сұлу Алматы қаласын содырлардың соққысынан қорғау жолында жауға жүрегін тосқан екен. Сөйтіп, Ринат Қамбетов елі мен жерінің, туған өлкесі мен ата-анасының алдында перзентік борышын осылайша адал атқарып, мәңгілік сапарға аттанған екен. Бауыр десе бүйрегі бұрып, елім десе көңілі елжіреп тұратын елгезек, сөзге шешен, ұлттық тәрбиені бойына жиып өскен Ринат Қамбетовтің қиын-қыстау шақта көрсеткен патриоттығы мен ержүректілігі ел есінен кетер ме?! Аты өшер ме?! Жоқ, әрине. Көңілге медеу болары – ол бүгінгі ұрпаққа, жастарға, бозбалаларға батырлықтың, ел басына қара бұлт төнгенде қайсарлықтың өшпес ізін қалдыруы! «Ерлік ешқашанда ұмытылмайды» дегендей, Қамбетов Ринат Талғатұлына ҚР Президентінің Жарлығымен ІІІ Дәрежелі «Айбын» ордені берілді. Бұл өте жоғары әрі орынды марапат деп білеміз.
Иә, әскери қызметші болуды жастайынан мақсат тұтқан Ринатымыз сын сағаттарда өзінің үлкен тұлға екенін дәлелдеп, азаматтығын биік ұстап, қас-қағым сәтте бұл жалғаннан өте шықты. Бүгінгі және келер ұрпақ енді «Айбынды» ұлдың ерлігімен мақтанатын болады. Батырлығына бас иіп, рухына тағзым ететін болады!
Бақұл бол, Ринат бауырым! Қақаған қыста Жер – Ана топырағымен бойыңды жылытсын… Сенің көрмеген қызығың мен тәтті өміріңнің әр күні мен түнін Жаратқан Иеміз қос бірдей тұяғың – Ахметжан мен Мұхамбетжанға бұйыртсын! Айтпағым,Ринаттай елі мен жерін, Отанын, ата-анасын аялаған қаракөздер Қазақ елінде көбейсе екен. Тек, ержеткенде елін сатпаса екен?!
Ақ Жайық өңіріндегі барша зиялы қауым атынан:
М.ШҮЙІНШӘЛИЕВА
Соңғы жаңалықтар
ОТАНДЫҚ ӨНДІРІСТІ ДАМЫТУ – ЭКОНОМИКАЛЫҚ ӨСІМНІҢ МАҢЫЗДЫ КЕПІЛІ
ТАСҚАЛА АУДАНЫНДА «ӘДІЛЕТ» ПАРТИЯСЫНЫҢ ӨКІЛДЕРІ ТҰРҒЫНДАРМЕН КЕЗДЕСТІ
ӨНДІРІСТЕН РУХАНИЯТҚА ДЕЙІН: ӘДІЛЕТ ПАРТИЯСЫ ӨКІЛДЕРІ ЖАҢАҚАЛАЛЫҚТАРМЕН ЖҮЗДЕСТІ
«ӘДІЛЕТ» ПАРТИЯСЫНЫҢ САЙЛАУАЛДЫ БАҒДАРЛАМАСЫ КАЗТАЛОВ ЖҰРТШЫЛЫҒЫМЕН ТАЛҚЫЛАНДЫ
«ӘДІЛЕТ» ПАРТИЯСЫНЫҢ КӨШПЕЛІ ШТАБЫ ЖӘНІБЕК ЖҰРТШЫЛЫҒЫМЕН КЕЗДЕСТІ
Тұрақты даму – тиімді мемлекеттік басқару мен ортақ жауапкершіліктің нәтижесі
Бөрлі ауылында «Әділет» партиясының облыстық штаб мүшелері тұрғындармен кездесті
Жаңа Қазақстан Конституциясы – Әділетті қоғамның құқықтық негізі
«Жаңа талап» мемлекеттік қызмет мектебінің жаңа оқу жылы басталды
КАЗТАЛОВ АУДАНЫНДА 2 МЛРД ТЕҢГЕНІҢ 26 ИНВЕСТИЦИЯЛЫҚ ЖОБАСЫ БОЙЫНША МЕМОРАНДУМҒА ҚОЛ ҚОЙЫЛДЫ
Конституцияның 6-бабы: саяси әралуандық пен қоғамдық тұрақтылықтың құқықтық негізі
АВТОМОБИЛЬ КӨЛІГІ ЖӘНЕ АВТОЖОЛ САЛАСЫ ҚЫЗМЕТКЕРЛЕРІ ҚҰРМЕТКЕ БӨЛЕНДІ
Болашақтың экономикасына байыппен көшуге құқықтық негіз болатын жаңа Азаматтық кодекс қабылдау қажет»
Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы
Президент Қасым-Жомарт Тоқаев 28 қазан күні Қазақстан халқына Жолдауын жариялайды
Президент шет мемлекеттер басшыларының Ұлттық мерекемізге орай жолдаған құттықтауларына ризашылығын білдірді
ОРАЛДА РЕСПУБЛИКА КҮНІНЕ ОРАЙ МЕМЛЕКЕТТІК ТУ КӨТЕРУ РӘСІМІ ӨТТІ
Облыс әкімі Нариман Төреғалиевтің Республика күнімен құттықтауы
Жедел медициналық көмек станциясының жаңа әкімшілік ғимараты салынуда
Пікір үстеу