Х.БӨКЕЕВА ТЕАТРЫ АРНАЙЫ СЫЙЛЫҚҚА ИЕ БОЛДЫ

Х.Бөкеева атындағы Батыс Қазақстан облыстық қазақ драма театры Жанат Хаджиев атындағы ІІІ халықаралық театрлар фестивалінде «Қазылар алқасының арнайы сыйлығына» ие болды.

15-19 қазан аралығында Қарағандының мәдениет, архивтер және құжаттама басқармасы мен С. Қожамқұлов атындағы Жезқазған қазақ музыкалық-драма театрының ұйымдастыруыменЖанат Хаджиев атындағы ІІІ Халықаралық театрлар фестивалі өтті. Фестивальге Ғ.Мүсірепов атындағы Қазақ Мемлекеттік академиялық балалар мен жасөспірімдер театры, Семейдің Абай атындағы Мемлекеттік қазақ музыкалық-драма театры, Х.Бөкеева атындағы Батыс Қазақстан облыстық қазақ драма театры, Қырғызстан Республикасының А.Умиралиев атындағы Бішкек драма театры, Өзбекстан Республикасының «Турон» Мемлекеттік театр студиясы, Тәжікстан Республикасының М.Вохидов атындағы Тәжікстан Мемлекеттік жастар театры қатысып, қойылымдарын көпшілік назарына ұсынды.

Қатысушылардың өнеріне Астана Жастар театрының көркемдік жетекшісі Нұрқанат Жақыпбай бастаған театр тарландары мен сыншылары баға берді. Қазылардың шешімімен Х. Мюллердің «Филоктет-Медея» спектаклімен Хадиша Бөкеева атындағы қазақ драма театрының ұжымы «Қазылар алқасының арнайы сыйлығы» номинациясына лайық деп танылған.

Атап өту керек, қыркүйек айында Х.Бөкеева атындағы облыстық театр Қырғызстанның Ош қаласында өткен VII халықаралық ″ART-ORDO – 2019″ театр фестиваліне «Арманым-Әселім» спектаклімен қатысып, бірнеше жүлдеге қол жеткізген болатын. Нақтырақ айтқанда, спектакльдің режиссері Талғат Теменовке «Алтын Жетіген» статуэткасы табыс етілді. Ұжым ТURKSOY халықаралық мәдениет орталығының арнайы жүлдесіне ие болды. Үздік әйел образы бойынша екінші пландағы номинацияны Наргиза Шадыева иеленді. Мұнымен қоса театр «Ел алғысы» дипломымен, Ош шахарының мэрінің алғыс хатымен, министр А.К. Жаманқұловтың арнайы сыйлығымен марапатталған еді.

Версия для печати