Зауыттар заманауи жабдықпен жаңарады

Еліміздің әлеуметтік-экономикалық дамуының жаңа кезеңінде инновацияларды ілгерілету – стратегиялық басымдықтардың біріне айналып отыр. Бұл бағыттағы жұмыстар жуырда өткен Үкімет отырысында жан-жақты қаралып, нақты міндеттер айқындалды.

Screenshot

Қазақстан Республикасының Премьер-министрі Олжас Бектенов төрағалық еткен жиында өңірлердегі инновациялық әлеуетті арттыру мәселесі күн тәртібінің өзегіне айналды. Аталған жиынға Нариман Төреғалиев селекторлық режим арқылы қатысып, өңірдегі ахуал мен атқарылып жатқан жұмыстарды назарға алды.
Батыс Қазақстан облысында кейінгі жылдары инновациялық даму бағытында жүйелі жұмыстар жүргізіліп келеді. Әсіресе, ғылым мен өндірістің өзара ықпалдастығын күшейту арқылы нақты секторға серпін беру – басты міндеттердің бірі. Бұл ретте өңірдегі жоғары оқу орындары белсенді рөл атқарып отыр. Соның ішінде Жәңгір хан атындағы Батыс Қазақстан аграрлық-техникалық университеті ауыл шаруашылығы саласындағы кәсіпорындармен бірлесе отырып, құны 2,3 млрд теңгені құрайтын төрт ірі жобаны жүзеге асыруда. Бұл жобалар ғылыми-техникалық жетістіктерді өндіріске енгізу арқылы аграрлық сектордың тиімділігін арттыруға бағытталған.
Сонымен қатар, импортты алмастыру саясаты аясында маңызды қадамдар жасалуда. Батыс Қазақстан инновациялық-технологиялық университеті ғалымдары отандық ветеринарлық препараттарды әзірлеп, оларды Эпсилон компаниясымен бірлесіп өндірістік айналымға енгізді. Бұл – еліміздің фармацевтика және биотехнология саласындағы тәуелсіздігін арттыруға бағытталған маңызды бастама.

Screenshot

8,9 млрд теңгеге инновациялық жабдықтар сатып алған

Өңдеуші өнеркәсіпте де жаңғыру қарқыны айқын байқалады. Аймақ кәсіпорындары өндірістік қуаттарын кеңейтіп, өнім сапасын арттыру үшін заманауи технологияларды белсенді түрде енгізуде. Соңғы мәліметтерге сәйкес, өңірдегі кәсіпорындар жалпы құны 8,9 млрд теңгеге инновациялық жабдықтар сатып алған. Бұл инвестициялар өндірістің тиімділігін арттырып қана қоймай, жаңа жұмыс орындарын ашуға және бәсекеге қабілетті өнім шығаруға мүмкіндік береді.
Нақты мысалдарға тоқталсақ, QazExpoCentre-Pipe компаниясы мұнай-газ саласына қажетті муфталар шығаратын жаңа өндірістік учаскені іске қосты. Бұл жоба отандық өнімнің үлесін арттыруға және импортқа тәуелділікті азайтуға бағытталған. Ал Орал сауда-өнеркәсіп компаниясы елімізде алғаш рет коммуналдық инфрақұрылымға арналған үш қабатты құбырлар шығаратын экструзиялық желіні іске қосты. Мұндай технологиялар инфрақұрылым сапасын жақсартып, ұзақ мерзімді пайдалануға мүмкіндік береді.
Жалпы алғанда, өңірдегі инновациялық серпін экономиканың әртүрлі саласын қамтып отыр. Бұл үрдіс өндіріс тиімділігін арттырумен қатар, ғылыми әлеуетті коммерцияландыруға жол ашуда. Сарапшылардың пікірінше, мұндай бастамалар ұзақ мерзімді перспективада өңірдің инвестициялық тартымдылығын күшейтіп, жаңа технологияларға негізделген экономиканы қалыптастыруға ықпал етеді.
Үкімет отырысынан кейін өңір басшысы жауапты мекемелерге инновациялық экожүйені дамыту бойынша нақты тапсырмалар берді. Атап айтқанда, ғылыми жобаларды қолдау, стартап бастамаларды қаржыландыру және өндіріс орындарымен байланысты күшейту мәселелеріне ерекше назар аударылды.
Өңірде қолға алынған инновациялық бастамалар – өңір экономикасының сапалы жаңа деңгейге көтерілуіне негіз болып отыр. Заманауи технологияларды енгізу мен ғылым мен өндіріс арасындағы байланысты нығайту – тұрақты дамудың басты кепілі. Алдағы уақытта бұл бағыттағы жұмыстар жалғасын тауып, өңірдің индустриялық-инновациялық әлеуеті одан әрі арта түсетіні сөзсіз.

Д.ТАЛҒАТҚЫЗЫ

Версия для печати