ОРАЛДА «АТАМЕКЕН» КОМЬЮНИТИ ОРТАЛЫҒЫ АШЫЛДЫ

Орталықтың ғимараты бұрынғы аула клубы орналасқан нысан. Қазақстан Республикасы Тәуелсіздігінің 30 жылдығы қарсаңында және 1 маусым – балаларды қорғау күніне орай Орал қаласының әкімдігінің қолдауымен ағымдағы жөндеуден өтіп, комьюнити орталық ретінде ашылып отыр. Жаңарған орталықтың салтанатты ашылуына шаһар басшысы Абат Шыныбеков қатысты.

– Бүгін Орал қаласында балаларды қорғау күніне орайластырылған түрлі шаралар ұйымдастырылуда. Соның бірі қаламыздың тарихи орталығында «Атамекен» комьюнити орталығының салтанатты ашылуына куә болып тұрмыз. Бұл балалар клубы ретінде өткен ғасырдың 70 жылдары құрылып, мақсатына сәйкес жас ұрпақты тәрбиелеуде, балалардың шығармашылығын шыңдауда жұмыс жасап келеді. Тәуелсіз Қазақстанның жарқын болашағы – балаларымыз. Мемлекеттің басты мүддесі – біздің балаларымызға сапалы білім, саналы тәрбие беріп, денсаулықтарын сақтау. Денсаулықты сақтау – өзімізді қорғаудан, түрлі шараларға қатысу, табиғат аясындағы демалыстарды ұйымдастыру. Бұл жұмыстарды жүргізуде балалар аула клубтарының, мәдени-ағарту саласы қызметкерлерінің өлшеусіз еңбегін атап өту қажет. Соның арқасында балғындарымыз жан-жақты дамиды. Әрине бұл орталыққа келген балғындардың бәрі жұлдыз болып кетпес, дегенмен белгілі бағытты қалыптастыруда, рухани көкжиегін кеңейтуге мүмкіндік алады деп сенемін. Жаңа орталық балаларымызға шаттық сыйласын, – деді Абат Абайұлы.

Аула тұрғыны Нұрғали Демесінұлы нысанды жаңартып, мерекеге орай сый жасағаны үшін қала әкімдігіне, мәдениет қызметкерлеріне алғысын білдірді. Үйірмелердің тәрбиеленушілері өнерлерін көрсетіп, қала әкімімен бірге тілек шарын ұшырды.

Ғимараттың жөндеу жұмыстарына жергілікті бюджет есебінен 5,8 млн. теңге жұмсалған. Көрнекіліктер жаңаланып, үйірмелерге қажетті жабдықтар алынған. Өнер орталығында асық ату, сурет, вокал, көркемсөз үйірмелері жұмыс жасайды. Сонымен қатар енді Мұхит Мерәліұлының 180 жылдығы аясында Мұхит сыныбы ашылып отыр. Үш жүзден ән оздырған сал Мұхиттың ән-күйлерін әнші-термеші, ҚР еңбек сіңірген қайраткері, «Еңбек ері» медалінің иегері Сағдат Рахметжанов үйрететін болады.

Айта кетейік, Оралда қалалық мәдени-ағату бірлестігіне қарасты 22 ұйым бар. Олардың 19-ы – аула клубы. Осы аула клубтары заманға сай өзгеріп көшіп, комьюнити орталықтары ретінде ашылуда. Бірлестік директоры Серік Тоқмамбетовтың айтуынша, бүгінде бес аула клубы комьюнити орталыққа айналған. Яғни енді балалар ғана емес, егде жастағы тұрғындар да орталыққа келіп бос уақыттарын өткізе алады.

– Комьюнити-орталық таңертеңгі сағат 9.00-ден 18.00-ге дейін балалармен жұмыс жасаса, кешкі 18.00-ден кейін үлкендермен жұмыстар жүргізіледі. Үйірмелер тегін. Алдағы уақытта «Балауса», «Шабыт» аула клубтарын комьюнити-орталық бағытына өзгерту ұсынылып отыр, – деді Серік Тоқмамбетов.