АЛАЯҚТАРҒА АЛДАНЫП ҚАЛМАҢЫЗ

Биыл Батыс Қазақстан облысында 655 алаяқтық фактісі тіркеліп, 435-іне қатысты қылмыстық іс қозғалған. 2017 жылдың 10 айында 709 алаяқтық фактісі тіркелген, оның 540 бойынша қылмыстық іс қозғалды.

Адамзат баласын әбігерге салып, материалдық және моральдық тұрғыдан әжептәуір зиянын әкелетін қылмыс түрі соңғы кездері жиі тіркелуде. Бұл – алаяқтық фактілері. Соңғы күндері тіркелген жедел мәліметтерге жүгінсек, үйіңізге сәп-сәнді жиһаз жасап әкеліп беремін немесе ұялы телефоныңызбен хабарласамын деген сылтаумен азаматтарды алдап соққан алаяқтардың жымысқы ойлары тіркелді. Мәселен, 19 қазанда еш жерде жұмыс жасамайтын, 1988 жылы туылған белгісіз тұлға азғантай уақыт аралығында үй жиһазын жасап беремін деп Оралдық азаматшаның сеніміне кіріп, 217 мың теңгесін санап алып бой тасалаған. Алайда, алаяқ деп танылған тұлғаның теріс ниеті алысқа бармады. Жедел іздестіру шаралары нәтижесінде «жиһаз жасағыш» жігіт ұсталып, оның жеке басы туралы деректер жинақталды.

24 қазан күні тәуліктің екінші жартысында белгісіз тұлға «Кірпіш зауыты» ауданында сенімге кіру арқылы өзгенің «Айфон-7» маркалы ұялы телефонын сұрап алып, танысына хабарласпақшы болған. 1989 жылғы телефон иесіне сол мезетте 150 мың теңге шығын келген еді. Полицияға уақытылы хабарласуы нәтижесінде қымбат ұялы телефонды иемденіп, алдап алған алаяқ азаматша ұсталды. Келтірілген алаяқтық фактілеріне қатысты қылмыстық істер қозғалып, тергеу амалдары жүргізілуде.

Алаяқтыққа барып, ішкі арам ойын жүзеге асыруды көздеген тұлғалардың қармағына қарапайым азаматтардың түсіп, соңынан алданғанын сезіп, санын соғып жатқандары аз емес. Кейбірінің ойдай сеніміне кіріп, жинап отырған бірнеше мың теңгесін қымқырып әкететіндері тағы бар.

Сол себепті облыс пен қала тұрғындарының алаяқтарға алданып қалмауларын, жалған телефон шалушылардан сақ болуларын сұраймыз.

Орал қ.ПБ

Версия для печати