ЖАУЫНГЕР БОТҚАСЫНАН ДӘМ ТАТТЫ

Бұл күні қалалық мәдениет және демалыс саябағында жергілікті өнерпаздардың қатысуымен майдангерлерге рух беретін, бүгінгі ұрпақ үшін де қасиетті әуендер шырқалып, ардагерлерге және тыл еңбеккерлеріне арналған Жауынгер ботқасы дайындалды.

Мерекелік шара барысында ардагерлерге дастарқан жайылып, сый-құрмет көрсетілді. Қарт майдангерлер сарбаз ботқасынан дәм татып, сұрапыл соғыстың қым-қиғаш сәттері мен бастарынан өткен қиындықты еске түсірді.

Саябақта қалалықтарды Ұлы Жеңістің 74 жылдығымен қала әкімі Мұрат Мұқаев құттықтады.

– Ұлы Жеңістің ерлікке толы, тарихи күндері ешуақытта ұмытылмайды. Майдангерлеріміздің Отан қорғауда жасаған ерліктері мәңгілік, ол уақыт ағысымен жоғалып кетпейді. Отанға қалтқысыз қызмет етудің үлгі-өнегесін көрсеткен жеңімпаз бабаларымыздың рухына бас иеміз. Тәуелсіз мемлекетімізде, қазақ жерінде Көк байрағымыз мәңгі желбірей берсін, елімізде бейбітшілік мәңгі орнасын, – деді Мұрат Рахметұлы. Өз кезегінде зейнеткер-ұстаз Меруерт Жолдықайырова ардагерлердің үнемі басын қосып, рухын көтеріп отыратын облыс әкімі Алтай Сейдірұлына, қала басшысына ардагерлер атынан алғыс білдірді. – Ұлы Отан соғысы кезінде үш жыл жарымдай облыстық радиода диктор болып жасадым. Ол кезде А.Пушкин атындағы институттың студенті едім. Соғыстың барысы жөнінде бірде жылап отырып, бірде қуанып, жақсылы-жаманды хабар тараттық. Бір күні университеттің ректоры «Сізді облыстық радиодан шақырады» деп елең-алаңнан айтқанда тоғызыншы мамыр болатын. Сонда біз «Тыңдаңыздар, тыңдаңыздар. Оралдан сөйлеп тұрмыз. Бүгін ауа температурасы 25 градус ыстық. Сіздерге бүгін өте қуанышты хабарды жеткізгелі тұрмыз. Совет Армиясы жеңіске жетті. Енді бұдан былай соғыс болмайды. Қуаныңыз! Қуаныңыз!» деп радиодан ақпарат таратқан едік. Сөйтіп сабаққа кетіп бара жатсақ, қазіргі Абай алаңына қарақұрым халық жиналып, қуаныштан билеп жатты. Бүгін баршамыздың қуануымыз орынды. Қазір бақытты елміз. Өңіріміз өркендеді. Елімізде тек тыныштық болсын, – деген ардагер ұстаздың жылы естелігі жұртшылықты тебірентті.