Тәуелсіздік тарихшылар көзімен

Бүгін, 13 желтоқсан күні М.Өтемісов атындағы Батыс Қазақстан университетінде Қазақстан Республикасының Тәуелсіздігі күніне арналған «Тәуелсіздік тағылымы: келешек көкжиегі» тақырыбында республикалық ғылыми-тәжірибелік конференция өтті.

Жиынның тізгінін М.Өтемісов атындағы БҚУ-дың қауымдастырылған профессоры, тарих ғылымдарының кандидаты Бақтылы Боранбаева ұстады. Алғы сөз университеттің Ғылыми жұмыс және халықаралық байланыстар жөніндегі проректоры, география ғылымдарының кандидаты, профессор Қажымұрат Ахмеденовке берілді. – Баршаңызды Тәуелсіздік күнімен құттықтаймын! Тәуелсіздік – бабалар аманаты, баға жетпес байлығымыз. Бұл күн – боздақтар рухына тағзым күні. Азаттық үшін арпалысқан батырларды ешқашан ұмытпаймыз. Бүгінгі конференцияға еліміздің әр аймағынан қатысып отыр. Көпке өнеге берер жиын боларына сенімдімін, – деді Қажымұрат Мақсотұлы.

М.Өтемісов атындағы БҚУ аға оқытушысы, PhD доктор Назгүл Сабырғалиева «Бөкей Ордасындағы ислам және ахун Жабир Хамадовтың қызметі», БҚО тарихи-өлкетану музейінің бөлімі М.Мәметова мемориалдық музейінің меңгерушісі, ҚР Журналистер одағының мүшесі Ахмедияр Батырханов «Соғыс тұтқындары – соғыс құрбандары», Орал қалалық №41 мектеп-лицейінің тарих пәні мұғалімі Орынгүл Жұмағалиева «Тәуелсіздік – қастерлі құндылығымыз», М.Өтемісов атындағы БҚУ Тарих БББ 2-курс магистранты Гүлшат Жолахова «Азаттық оңай келген жоқ: 1991 жылғы Орал оқиғасы» тақырыптарында баяндама оқыды.

Сондай-ақ конференцияға онлайн түрде қатысқан Х.Досмұхамедов атындағы Атырау мемлекеттік университетінің профессоры, тарих ғылымдарының докторы Лесқали Бердіғожин «Азаттық күрес сардары, батыр Исатай Тайманұлы», академик Е.А.Бөкетов атындағы Қарағанды университеті гуманитарлық ғылымдар магистрі, аға оқытушы Гүлмира Уалиева «Еліміздің еркіндігі – тәуелсіздік», Ақтөбе облысы, Мәртөк ауданы, №2 Мәртөк мектеп-гимназиясының тарих пәні мұғалімі, магистр Айдана Дузбасова «Қазақстан Республикасындағы жастар саясаты» тақырыптарында сөз қозғады.

Жиынға студенттер мен магистранттар қатысып, пікірлерін айтып, сауалдарына жауап алды.

Дәметкен САҒЫНБАЕВА

Версия для печати