БҚО-ДА КЕЙБІР БІЛІМ БЕРУ ҰЙЫМДАРЫНЫҢ АТАУЛАРЫН ӨЗГЕРТУ ҰСЫНЫЛДЫ

Бүгін БҚО мәслихатының кезекті 25-ші сессиясында Батыс Қазақстан облысындағы кейбір білім беру білім беру ұйымдарына атау беру және қайта атау мәселесі күн тәртібіне шығарылып, депутаттар тізім бойынша көрсетілген мектептерге атау беру және қайта атау туралы ұсынысты қолдады.

– ҚР Президенті әкімшілігінің тапсырмасына сәйкес тарихи атауларды жаңғырту және идеологиялық тұрғыдан ескірген атауларды реттеу мақсатында аудандар мен қаладағы білім беру ұйымдарын қайта атау туралы ұсыныс түскен болатын. Осы ұсыныстар негізінде обылыстық тілдерді дамыту басқармасы ҚР әкімшілік-аумақтық заңына сәйкес БҚО-ның кейбір білім беру ұйымдарына атау беру және қайта атау туралы бірлескен қаулы шешім жобасын әзірледі, – деген облыстық тілдерді дамыту басқармасының басшысы Айгүл Әділгерейқызы қайта атауға ұсынылған мектептердің тізімін халық қалаулыларына беріп, аталған жобаны республикалық ономастикалық комиссия қарауына енгізуге қолдау көрсетуді сұрады.

Тізім бойынша Ақжайық, Бөрлі, Қазталов аудандарындағы бірнеше мектепті қайта атау және Орал қаласындағы №44 орта мектепке мемлекет және қоғам қайраткері Д.Қонаевтың есімін беру ұсынылған.

Ал Ақжайық ауданындағы Краснояр орта жалпы білім беретін мектебіне – ағартушы-педагог Ы.Алтынсаринның есімін, Харькин орта жалпы білім беру мектебіне – Х.Доспанованың есімін беру, Болдырев негізгі мектебін – Үштөбе негізгі мектебі, Горячкин негізгі мектебін – Мойылды, Каленный бастауыш мектебін – Ақбұлақ бастауыш мектебі деп атау ұсынылды.

Қазталов ауданы бойынша Богатырев орта жалпы білім беру мектебіне – қазақ тіл білімі мен әдебиеттану ғылымдарының негізін салушы ғалым, ұлттық жазудың реформаторы Ахмет Байтұрсынұлының есімін беру, Мирон негізгі мектебін – Жаңатаң негізгі мектебі, Никонор бастауыш мектебін – Қособа бастауыш мектебі, Бөрлі ауданындағы Григорьев орта мектебін – Кеңтүбек орта мектебі, Киров мектеп-балабақша кешінін – Қарағанды мектеп-балабақша кешені, Тихонов мектеп-балабақшасын – Қара құдық мектеп-балабақшасы деп атау ұсынылуда.

Эльмира НҰҒМАНОВА

Версия для печати