АДАМДАРДЫҢ КӨЗ ЖҰМУЫНА ӘКЕЛЕТІН АУРУ ТҮРЛЕРІ ТҮЗІЛДІ

7 сәурі – дүниежүзілік денсаулық күні. Бұл күнді атап өтудегі мақсат – жұртшылық назарын денсаулық саласындағы көкейтесті мәселелерге аудару. Дүниежүзілік денсаулық сақтау ұйымы биыл медициналық көмектің негізгі түрлерінің қолжетімділігіне тағы бір рет тоқталуды көздеп отыр. Себебі, ұлт саулығын сақтауға қарапайым тексерулердің өзі жеткілікті.

Ресми статистикаға сүйенсек, 2018 жылы Қазақстанда негізгі деген аурулардан 19,3 мың адам көз жұмған. Оның 7,5 мыңға жуығы – еңбекке қабілетті жастағылар. Халқының саны 18 миллионнан аспайтын еліміз жыл сайын «тепсе темір үзетін» 7,5 мың тұрғынынан айырылып отырады. Мамандар пікірінше, бұған өлім-жітімнің басты себепкері болатын негізгі 5 аурудың ықпалы мол. Мысалы, Батыс Қазақстан облысы бойынша адамдардың көз жұмуына апаратын аурулардың бестігі төмендегідей түзілді.

жүрек-қан тамыры аурулары;
онкологиялық сырқаттар;
жүрек аурулары;
ми қан айналысының бұзылуы (инсульт);
қан қысымының артуы (гипертония) ;

Қайтыс болған науқастардың басым бөлігінің өліміне дәрігерге өте кеш қаралуы себеп. Яғни, «дер кезінде анықталған жағдайда олардың өмірін сақтап қалуға болар еді» дейді мамандар. Сондықтан Медициналық сақтандыру қоры алдағы уақытта аурудың алдын алу мәселесіне басымдық беруді жоспарлап отыр.

Статистикаға сүйенсек, жыл сайын елімізде 2,9 миллионға жуық адам ауруханаға жатып емделеді. Оның 70 пайызға жуығы немесе 1,9 миллионы – дерт меңдеп, ауруханаға шұғыл түрде жеткізілгендер. Былайша айтқанда, Қазақстанда әрбір оныншы адам дәрігерлер алдына өміріне қауіп төнген кезде ғана келеді деген сөз. Мұндай жағдайда науқастың тегін негізгі көмектен бөлек, бағасы қымбат процедуралардың ақысын қалтасынан төлеуге мәжбүр болатыны жасырын емес. Әлбетте, мемлекеттік тапсырыс шеңберінде тегін көрсетілетін, шығыны аз диагностикалық процедуралардың көмегімен мұның алдын алуға болады, дейді мамандар. Мәселен, 2019 жылы Батыс Қазақстан облысы бойынша бюджеттен 32,9 млрд млрд теңге кепілдендірілген тегін көмектің көлеміне бөлінді. Оның 14,6 млрд жуығы емханалық-амбулаторлық көмекке жұмсалып, профилактикалық іс-шараларға басымдық берілмек.

Естеріңізге сала кетсек, биылғы жылы мемлекеттік тапсырысты орындайтын 51 медицина ұйымының 15-і жеке меншік.

«Әлеуметтік медициналық сақтандыру Қоры» КеАҚ БҚО бойынша филиалы

Версия для печати