АҚЫН ҒАЙСАҒАЛИ СЕЙТАҚТЫҢ КЕШІ ӨТТІ

Қадыр орталығында Қазақстан Жазушылар Одағының мүшесі, Т.Айбергенов атындағы сыйлықтың иегері Ғайсағали Сейтақтың «Отаным, Орда, Оралым» атты шығармашылық кеші өтті.

Арыны бөлек, дарыны даусыз ақынға БҚО мәдениет басқармасының басшысы Қ.Мұсағалиев Алғыс хат табыстап, биылғы 60 мерейжасымен жырсүйер қауымның атынан құттықтады. Махамбет Өтемісұлы атындағы БҚМУ филология факультетінің деканы, филология ғылымдарының кандидаты, доцент З.Мүтиев, филология ғылымдарының докторы, профессор М.Сабыр, Қазақ тілі қоғамы БҚО филиалының төрағасы Б.Жексенғалиевтер ақын шығармашылығының маңыздылығына тоқталса, ақын-ұстаз Д.Мұштанова Қазақстан Жазушылар Одағының мүшесі, ақын А.Шахин үзеңгілес достарына үкілеп алып келген жырларын оқыды. Ал ақын З.Сейсенғали өз тілегінен бөлек Жаңақала ауданының әкімі Н.Қарағойшиннің Алғыс хаты мен естелік сыйлығын табыстады.

Кеш барысында Нарынның нар ұлының сөзіне жазылған «Әнші жарының аманаты», «Анаға хат», «Жайықта Шарабасов біреу ғана», «Желтоқсан қырандары», «Жайнай бер, Тасқала», «Астана» т.б. әндері Қазақстанның еңбек сіңірген әртісі Қ. Қожақов «Ерен еңбегі үшін» медалінің иегері Дастан Есентеміров, ҚР Мәдениет саласының үздігі Майра Хайдарова бастаған Т.Жауымбаев, Р.Кереев, Р.Хафизов, А.Дәулетқалиев, А.Ажғалиева, С.Изделеев, Қ. Сағидоллин, Н.Айтуған секілді әншілердің орындауында шырқалды.

Әдеби кештің мазмұны ақынның өз өлеңдерін оқуымен айшықталды. Сонымен қатар М.Өтемісов атындағы БҚМУ студенттері Ә. Аманжолов, А. Бақиев, Е.Қалижан және аталмыш оқу орнының түлегі О. Меңдіқұловтар ақын ағаларына арнаған өлеңдерін оқып, ел көңілінен шықты.

Шара соңында Ғайсағали Самиғоллаұлы жиналған қауымға ризашылығын білдіріп, алпыс жылдық мерейтойының қорытындысы іспеттес осы кешті ұйымдастырған Қадыр орталығы ұжымына «Қасиет қонған қара жер» атты жаңа жыр жинағын қолтаңбасымен тарту етті.

«Жайық үні»

Версия для печати